Skal lage VM-fest i Oslo
President i Norges Skiskytterforbund, Tore Bøygard frå Ål, har all grunn til å smile breitt. No er det klart at Holmenkollen får arrangere VM i skiskyting i 2016.
Det går fram av ei pressemelding frå Norges Skiskytterforbund sende ut sundag føremiddag. I juni vart det kjent at Norge og Holmenkollen var einaste søkjar til VM i 2016. Difor var sundagens vedtak i det internasjonale skiskyttarforbundet (IBU) meir ein formalitet.
IBU har denne helga sin tiande kongress i Merano i Italia. Sundag morgon var det offisielt at Norge og Holmenkollen skal vere vertskap for VM-arrangementet i 2016.
Artikkelen held fram under annonsen.
– Dyktige folk har jobba hardt for å vinne fram med denne VM-søknaden. No ligg det fire år med knallhardt arbeid framfor oss. Me har som mål å lage eit fantastisk arrangement, ein skikkeleg folkefest som skal bli hugsa, seier Bøygard.
Dette er tredje gang Norge søkjer om å arrangere VM i skiskyting.
– Det kjennest godt å vinne fram etter to tapte slag, seier Bøygard.
Både tidlegare og noverande skiskyttarprofilar har vore aktive i søknadsprosessen.
– Det er kjempemoro at VM igjen skal arrangerast i Norge. Holmenkollen er godt likt også blant utanlandske konkurrentar, med eit fantastisk publikum og eit flott anlegg. Eg trur og håpar at VM i 2016 blir ein skikkeleg folkefest, seier Ole Einar Bjørndalen i pressemeldinga.
