Marie var seks sekund frå å gjere reint bord på Liatoppen

Marie Utheim Svela (16) frå Figgjo vann både stafetten og sprinten, men vart slått med seks sekund av svenske Emma Larsson på fellesstarten og måtte nøye seg med andreplass.

Det vart nesten reint bord for den blide sørlandsjenta i sitt siste renn før ho tek steget opp i juniorklassen og må gå med gevær og skyte ståande.

— Kjempefornøgd

Fredag gjekk Marie siste etappe på vinnarlaget til Figgjo. Laurdag vann ho sprinten og fekk Hans Jørgen Tveitos minnepremie, og sundag var ho fattige seks sekund frå å vinne fellesstarten i J-16.

— Eg er kjempefornøgd sjølv om det vart ein bom for mykje til å vinne i dag, sa Marie etter målpassering.

Skiskyttarfestivalen med 950 deltakarar i alderen 9—16 år vart avslutta med fellesstart sundag. Sjølv om det var tøffe vindkast i blant, var det fine forhold alle dagane.

— Alt gjekk på skjener

— Det var litt snøfokk sundag morgon etter nysnøen som kom. Men elles var det fine konkurranseforhold alle dagane. Alt har gått på skjener, oppsummerte leiar i organisajonskommiteen, Nils Veslegard, då siste løparen var i mål sundag ettermiddag.

Det var mange utlendingar i toppen i 15- og 16-årsklassane. Dei avslutta IBU-campen på Geilo med å konkurrere på Liatoppen.

I 16-årsklassen for gutar vann Tristan Thrasher frå USA sprinten laurdag og fekk Hans Jørgen Tveitos minnepremie. Sundag var det sveitsaren Tobit Keller som trekte lengste strået på fellesstarten.

Tre pallplassar til Geilo

Det vart ingen lokale klassevinnarar i årets skiskyttarfestival, men tre pallplasseringar til Geilo.

Oda Øyo Simonsen tok ein sterk andreplass i fellesstarten for J-14 sundag. Klubbkameraten Vetle Nordby Endrestøl vart nummer tre laurdag og to sundag i G-11.

Med 60—70 deltakarar i klassar skal det stemme både på standplass og i løypa for å hevde seg i verdas største skiskyttarrenn for gutar og jenter. Og «vinden mellom øyro» er vel så viktig å takle som den som kjem i lufta.