Klart for nytt NM i Hallingdal

Hemsedal opna NM-vekene med alpintmeisterskapen, så tok Ål over stafettpinnen og arrangerte NM i skiskyting. I helga er det Geilo som er vertsskap når friskikøyrarane møtest for å dele ut NM-gull i slopestyle.

Det er venta over femti deltakarar til saman, og landslaget med Johanne Killi, Christian Nummedal, Birk Ruud og Øystein Bråten (Torpo) er venta til Geilo. Det er også Mikkel Brusletto Kaupang frå arrangørklubben, som har køyrt verdscup denne sesongen. Sudndøl og tidlegare X-Gamesvinnar, Andreas Håtveit er no trenar for geilingane, men stiller i helga som speaker. Der har han med seg treningskompis Bendik Øye frå Gol. Laurdag kårar dei meistrar i junior- og seniorklasse i Havsdalen, og deler ut Kongepokalen. Sundag er det hovudlandsrenn, uoffisielt NM for 13- og 14-år. I tillegg blir det railjam for ungar 0–10 år, og rekrutt 10–12 år.