Kan Bøkko forsvare gullet?

I dag, torsdag, har Håvard Bøkko sjansen til å gjenta bragda frå Inzell i fjor då VM-enkeltdistansar startar i Heerenveen.

Skøyter: Når VM enkeltdistansar opnar, er det på 1500-meteren det er knytt størst forventingar til Håvard Bøkko.

Torsdag er det er eitt år og tolv dagar sidan han gjekk sitt beste løp på distansen, og kunne kalle seg verdsmeister. 10. mars 2011 stod han øvst på sigerspallen, og ingen var gladare enn Håvard Bøkko då han strekte hendene i vêret etter siger i parløp med Shani Davis på Max Aicher Arena i Inzell. På siste vekslingssida var Davis i føringa, men Bøkko fann kjempekreftene, og på målstreken smatt han forbi amerikanaren og slo sølvvinnar Davis med fem hundredelar.

Reprise

I løpet av sesongen har han vore fleire gonger på pallen, og for halvanna veke sidan vann Håvard Bøkko verdscupen på 1500m samanlagt etter å ha utklassa nettopp verdscupleiar Shani Davis i parløp.

– Det synte at eg har vore den jamt over beste 1500-meterløparen i år. Det redda på mange måtar sesongen, sa Bøkko etter samanlagdsigeren i Berlin.

Siste vesle

Dei siste vekene har han lada opp til meisterskapen med trening i Berlin og heime, før Bøkkosyskena sette seg på flyet til Nederland måndag.

– 1500m blir hovudfokuset, det er den distansen eg kjem til å fokusere på fram mot meisterskapen, seier Håvard.

I oppladinga til meisterskapen har han gjort få endringar, men heller lagt vekt på å finne overskot og få ut det siste vesle.

– Planen er at eg berre skal finpusse dei siste små detaljane fram mot VM, seier Bøkko.

Optimist

For Hege Bøkko er hovudmålet å gå ein god 1500m fredag ettermiddag og avslutte sesongen med ei god plassering.

I verdscupfinalen i Berlin gjekk ho sin beste 1500m i verdscupen i vinter, og vart nummer ni på distansen.

– Eg håpar på ei topp ti-plassering, men om alt klaffar har eg tru på at eg kan klare topp seks. Eg gjekk eit greitt løp i Berlin, og det var ei forbetring frå tidlegare i sesongen. Det tek eg med meg vidare til VM, seier ho.