Aust møter vest

Hyttefolk på Ustaoset held tradisjonane i hevd. I år vart det arrangert påskeskirenn for 99. år på rad.

Rennet er ein viktig del av påskestemninga for generasjonar av hytteeigarar.

– Det er alltid god stemning og det bidreg til å binde hyttefolka saman, seier Torfinn Eide.

I år har han hatt vervet som rennleiar.

Stor og liten bakke

Det viktigaste med rennet er likevel å fremje skiglede blant barna. I år var det kring 280 barn som var påmeldt i dei tre greinene det blir konkurrert i.

Konkurransen strekkjer seg over to dagar. Langfredag var det hopp i liten og stor bakke, deretter tevling i slalåmløypa.

Påskeeftan vart det konkurrert i langrenn.

Stor prestisje

Rennet er prega av leik og moro, men det er òg seriøs konkurranse.

Det ber det bugnande premiebordet preg av.

Dei tre beste i kvar klasse får pokal i sølv, og alle som deltek får sølvskei med inngravert namn.

Til stas på peishylla

Påskerennet har også åtte vandrepokalar som det er knytt stor prestisje til.

– Å få napp i vandrepokalen gjev respekt. Pokalen blir plassert til stas i familiehytta til påskerennet året etter, seier Eide.

Med og utan skarre-R

Aust møter vest ved Ustaoset. Det gjev grunnlag for prestisjefylte oppgjer mellom dei med og dei utan skarre-R.

Ifølgje Eide er påskerennet i høg grad òg ein konkurranse mellom to landsdelar. I år viste det seg at dei som bur i nærleiken av i Nordmarka, var hakket kvassare i langrennsløypa.

– Det er slik det pleier å vere, innrømmer rennleiaren frå Bergen.

Persa i andre omgang

I stor bakke var det Herman Greve som landa det lengste hoppet i begge omgangane.

Han var likevel ikkje heilt nøgd med eigen innsats etter første omgang. Då han fekk lengdemålarane sin dom, kunne han ikkje tru sine eigne øyro.

– Var det berre 13, 5 meter? I fjor hoppa eg 15 meter. Ja ja, eg skal slå rekorden i neste omgang, sa han.

Og det gjorde han. Med 15,5 i andre omgang persa han og sette bakkerekord i årets hoppbakke.

Han kunne plassere Ustaoset Vel sin vandrepokal for beste eldste gut i slalåm og hopp på peishylla i familiehytta.

Forvirra i slalåmløypa

– Eg var sjølv med i påskerennet då eg var barn. I dag har eg barnebarn som stiller til start, seier Per Reidar Mortensen som er leiar i velforeininga.

Leiaren i Ustaoset Vel har alltid æra av å vere startar i slalåmrennet for dei yngste barna.

– Eg synest dette er den artigaste konkurransen. Det er alltid nokon som småtassar som blir forvirra og køyrer feil, smiler han.