Testa tryggleik på straum

EuroNCAP har endeleg testa Tesla Model S – som fekk toppkarakter. Det er ikkje sjølvsagt blant elbilane.

I 64 km/t dundrar ein skinande blank Tesla Model S inn i barrieren. Delar flyg og metall blir kraftig deformert. Inne i bilen sit fleire dokker stinne av sensorar for å analysera kollisjonen.

For Tesla Model S er resultata gode nok til at bilen får fem stjerner.

Feil på kollisjonspute

Den amerikanske elbilen kjem likevel ikkje heilt utan kritikk frå samanstøyten. I testen blir nemleg kollisjonsputa på passasjersida løyst ut for tidleg, dermed treffer hovudet på dokka dashbordet.

Feilen kjem av ein programmeringsfeil i styringssystemet til kollisjonsputene. Tesla skal allereie ha endra programvara, slik at kollisjonsputene no blir utløyste slik dei skal.

Bra tryggleik for barn

Kupeen i den tunge elbilen motstår frontkollisjonen utan å deformera seg nemneverdig.

Også i den brutale stolpetesten klarer Teslaen seg brukbart. Her blir bilen ramma frå sida med ein massiv stolpe i metall. Mange bilar fell gjennom her. Heller ikkje Tesla er perfekt, der vernet av overkroppen blir karakterisert som marginal.

Tesla har fått mykje kritikk for ikkje å ha justerbare hovudstøtter, men ifølgje testen frå EuroNCAP er vernet mot nakkeslengskadar god i bilen. Også barn blir frakta trygt i Tesla Model S, og i bakovervendt barnesete sit dei trygt.

Dermed følgjer Tesla Model S opp dei gode resultata bilen fekk då han blei testa av NHTSA (National Highway Traffic Safety Administration) i USA. I denne testen fekk Tesla Model S den høgste poengsummen ein bil nokon gong har fått.

Generelt god tryggleik

Mange elbilar er relativt små, vesentleg mindre enn Tesla Model S. Likevel er tryggleiken generelt svært god. Dei aller minste elbilane har likevel store brest i tryggleiken.

Dei mest populære bilane byr på god tryggleik dersom ulykka skulle vera ute. Nissan Leaf og Renault Zoe får begge fem stjerner, medan BMW i3 skuffar med å berre få fire stjerner. I testen der i3 blir ramma av ein stolpe, viser testdokkene ein auka fare for skadar i brystregionen, og det kostar bilen ei stjerne.

– Poengsummen ligg ikkje langt unna fem stjerner. Det er også viktig å peika på at krava blir strengare og strengare. BMW i3 har dessutan mykje tryggleiksutstyr som ikkje blir teke omsyn til i testen, seier Christian Gottschalk hos BMW Norge.

Mitsubishi i-Miev, Citroën C-Zero og Peugeot iOn er identiske bilar, og får fire stjerner av EuroNCAP. I frontkollisjonstesten konkluderer ein likevel med at bilane er heilt på grensa av kva dei tåler. Likevel held resultata til at bilane får fire stjerner. Dei kan likevel ikkje samanliknast heilt med testane ein har i dag. Desse bilane blei nemleg testa etter dei gamle normene, og der blei det ikkje teke omsyn til assistentsystem.

Skumle 4-hjuls motorsyklar

Dei aller minste elbilane, som er klassifiserte som firehjuls motorsyklar, får likevel krass kritikk av EuroNCAP. Tazzari Zero er heilt på grensa til å kollapsa, medan Renault Twizy er så stivt oppbygd at testdokkene får belastningar langt over grenseverdiane. Ifølgje EuroNCAP er faren for svært alvorlege skadar stor dersom ein kolliderer i ein av desse.

– Det er viktig å merkja seg at Twizy er klassifisert som ein firehjuls motorsykkel med den største motoren, og som moped med den minste elektromotoren. Difor skal ikkje Twizy samanliknast med ein bil. Bilen i testen var heller ikkje utstyrt med dører. Alle Twizyer selde i Noreg har dette, utan at vi kan seia om det ville ha påverka resultata, seier Roger Andersen, PR- og marknadssjef hos Renault i Noreg.

Ikkje testa

Verken Volkswagen e-Golf eller den heilt nye Mercedes B-klasse Electric Drive er testa av EuroNCAP, men versjonane med forbrenningsmotorar har begge fått fem stjerner. Med unntak av batteripakkane er bilane i prinsippet lik dei tradisjonelle søskena sine.

Det er dessutan verdt å merkja seg at ingen batteri blei skadd i testane. Sjølv ikkje i den massive stolpetesten blei batteria i nokon av testbilane skadde eller stod i fare for å kortslutta eller å ta til å leka.