Turistsjefen sluttar i stillinga

Pål Knutsson Medhus skal slutte i stillinga som turistsjef i Hol.

Medhus har teke dette valet i samråd med styret i Visit Geilo og styreleiar Roger Espeli.

Onsdag ettermiddag informerte styret Visit Geilos medlemmer om avgangen.

– Lidenskap og entusiasme

Pål Knutsson Medhus har vore ein profilert turistsjef sidan 2012.

– Det har vore fem spennande år, og eg trur fem år er nok, seier Medhus.

Som turistsjef seier han sjølv han «har gitt full gass og jobba ein del».

– Ein altoppslukande jobb?

– Ja, det er slik det vart, men slik har turistsjefsjobbar alltid vore. Ein må ha lidenskap og entusiasme om ein skal drive med dette.

– Kva gjer du framover?

– Eg har planar og håpar å arbeide vidare med vertsskap og sørge for at folk som kjem til kommunen har det bra, seier Medhus, som også vil tilbake i manesjen som foredragshaldar og underhaldar.

Samde om avgjerda

Årsaka til at Medhus og Visit Geilo avsluttar arbeidsforholdet er samansett.

– Me har hatt samtalar sidan i haust om vegen vidare. Eg lurte på om det var mogleg å trappe noko ned som turistsjef, seier Medhus.

Til det svara Espeli og styret:

– Skal me ha ein turistsjef, må det vere i 100 prosent stilling.

Både Espeli og Medhus er samde om at dette er rett avgjerd no.

– Og no må de ut på jakt etter ny turistsjef, Espeli?

– Me leitar ikkje umiddelbart etter ein ny turistsjef. Først skal me arbeide med vegen vidare for Visit Geilo. Det arbeidet startar i januar.

Organisering og økonomi

Styreleiaren takkar Medhus for innsatsen gjennom fem år.

– Pål har gjort ein kjempejobb. Me ser for oss å samarbeide med han vidare. Pål er ein person me vil dra nytte av, seier Espeli.

Fram mot ei ekstraordinær generalforsamling i februar skal det arbeidast med framtidig organisering og økonomi. Visit Geilo har i dag kring 250 medlemsbedrifter.

– Me må spisse meir og gape over mindre. Målretta marknadsføring vil bli prioritert høgast, seier Espeli.