Omkom på snowboard i Hemsedal

Ein mann i 20-åra er død etter ei ulykke i Hemsedal Skisenter måndag.

Ulykka skjedde i 11-tida i løype nummer seks.

Mannen køyrde snowboard saman med to kameratar då ulykka skjedde.

– I eit bratt parti sklei han og kom ut av løypa. Her trefte han ein stein. Kameratane såg at han fall, seier lensmann i Ål, Pål Mikkelrud.

Det var forsøkt å redde mannens liv med førstehjelp, men han vart erklært død på staden. Mannen var opphavleg frå Trøndelag, men budde for tida i Oslo. Pårørande er varsla.

Mikkelrud seier det er lite snø utanfor løypene.

– Det er rett og slett eit uhell, seier Mikkelrud.

Dagleg leiar i Skistar Hemsedal, Andreas Smith-Erichsen, vil ikkje si noko om ulykka.

– Det er politiet som handterer denne saka, seier Smith-Erichsen.

Dette er andre dødsulykka i Hemsedal Skisenter denne vinteren.I slutten av januar omkom ein svensk mann i 40-åra då han kolliderte med eit tre.