– Me må ta vare på regnskogen

– Folk er flinke til å støtte TV-aksjonen, tykkjer bøssebærar Miranda Nilsen (10) i Hol.

Med ein godt grep om handtaket på bøssa går Miranda Nilsen (10) bortover grusen, opp trappa og ringjer på. Ingen opnar. Kanskje er det for fint vêr, kanskje er ho ute litt for tidleg på ettermiddagen? Fire hus må Miranda banke på før det endeleg vankar ein setel i bøssa. Klassevenninne Sandra Mikkelsen Ellingplass står klar med pengar, og er snar om å opne døra. Men kva var det pengane skulle gå til igjen?

– Til regnskogfondet. Me må ta vare på regnskogen fordi det bur folk der, og mange av urtene som er viktige for å lage medisinar veks berre der. Blir regnskogen borte kan me ikkje lage dei medisinane lenger, forklarar Miranda.

Trufaste bøssebærarar

Tiåringen meiner det er femte året ho er bøssebærar for TV-aksjonen. I Hallingdal er det enkelt å rekruttere bøssebærar.

– Folk stiller år etter år, kva pengane går til er ikkje så viktig, stadfestar aksjonsleiar i Hol, Hallvard Lilleslett. Innbyggjarane er også stort sett positive, ifølgje Miranda, sjølv om det hender nokon seier nei til å putte pengar på bøssa. Det meste ho har fått frå ein husstand trur ho er to hundre kroner.

– Då seier eg tusen takk, smiler Miranda.

Stor gjevarglede

I lokala til Skue sparebank på Geilo står fire banktilsette på dugnadsjobb spente og ventar på 79 bøsser frå heile Hol kommune. Fyrst inn kjem Jarle Uthus, slik han brukar, og fleire sentrumsbøsser følgjer på.

– Dei som var heime synte stor gjevarglede, dette er triveleg, tykkjer Hanne Haatuft, som også er tidleg ferdig i år. Det sildrar likevel godt og lenge i teljemaskina når bøssa hennar blir tømt.

Like etter kjem Henrik og Finn Sataøen blide og fornøgde inn døra. Dei tykte det var triveleg å gå med bøsse for TV-aksjonen i fjor, og bestemte seg for å stille i år også.