Mange merka det kraftige jordskjelvet i natt: – Det buldra i golvet
Ved 06.30-tida måndag morgon rista det godt over heile Vestlandet. Også i Hallingdal merka folk jordskjelvet.
– Eg skulle til å stå opp då det buldra i golvet, fortel Hege Falck-Andersen i Hemsedal.
– Det har vore ein del sprenging på skuletomta, som ligg rett i nærleiken, så eg trudde det var dei som hadde begynt veldig tidleg. Sidan eg er styreleiar i sameiget her, var den første tanken min; «no kjem det til å kome klagar frå bebuarane», seier ho.
Artikkelen held fram under annonsen.
Men sprenging var det ikkje. I staden var det eit kraftig jordskjelv i Nordsjøen som forplanta seg heilt til fjells.
VG melder at Equinor stenger ein av sine plattformer i Nordsjøen etter skjelvet. Episenteret var mellom Stadt og Færøyane, 160 kilometer vest for Førde.
Sprenging eller fly
Johan Müller i Hemsedal merka godt at det rista. Men i likskap med Falck-Andersen tenkte heller ikkje han først og fremst på ei jordskjelv.
– Eg trudde det var ei skogsmaskin eller noko slikt på vegen nedanfor, som var på veg opp i tunet vårt. Eg gjekk for å sjekke, fortel han.
Men i tunet var det ingenting.
– Då tenkte eg eigentleg berre at det måtte ha vore sprenging i hyttefeltet ved Golfalpin ein snau kilometer unna. Eller ein kraftig morgonsalutt i steinbrotet til maskinlaget, som ligg 3-4 kilometer unna i luftline, seier Müller.
Ola Anderdal skriv på Hallingdølen si Facebook-side at han hadde ein annan teori då han merka skjelvet:
– Det høyrdest ut som eit Herkules-fly i låg høgde.
Artikkelen held fram under annonsen.
– Uvanleg kraftig
Forskingsinstituttet Norsar melder til NRK at skjelvet hadde ein styrke på 5 på skalaen, noko som er det kraftigaste på 33 år.
– Det var eit uvanleg kraftig jordskjelv. Me meiner styrken er på 5,1, så det vil kjennast i eit veldig stort område, seier administrerande direktør i Norsar, Anne Strømme Lycke til NRK.
