I dag blir det kraftfull jubileumsfeiring

Hallingdals einaste lokaleigde kraftleverandør feirar 25 år.

18. desember 1992 vart Ustekveikja Energi danna.

Jubileet vart markert i Skarvebui i gågata i Geilo sentrum laurdag.

Særeige namn

Dagleg leiar Bjørn Skaret har vore med i alle 25 åra.

– Utruleg artig å ha vore med på den reisa, seier han, og minnest oppstarten.

– Stiftingsmøtet var på Vestlia. Hol kommune og Buskerud Energi danna selskapet. Aksjekapitalen var 600.000 kroner.

Før stiftinga i 1992 var namnespørsmålet diskutert. Hol Energi var eitt forslag, Geilokraft eit anna. Valet fall på Ustekveikja, elva som renn frå Finseområdet og ned til Hallingdalsvassdraget.

– Dei skjøna nok ikkje kva for merkenamn dei vart samde om. Me får kundar berre på namnet også, seier Skaret.

– Det er eit spesielt namn som kling godt, seier marknadssjef Siv Nesfossen.

Stor vekst

Energilova av 1991 var grunnlaget for selskapet.

Selskapet skulle selje kraft frå kommunens eigne kraftverk Ustekveikja og Ørteren direkte til storkundar, og Brødrene Øyo på Geilo var første kunde. I dag leverer Ustekveikja tenester innan kraftrettar, kraftproduksjon, krafthandel og sluttkundesal til privat- og bedriftsmarknaden. Selskapet har 35 tilsette, 45.000 bustadkundar, omsetninga er på 650–700 millionar og eigenkapitalen er på 140 millionar. Frå 2006 til i dag har kommunen kunne ta ut 37 millionar i utbytte. Ustekveikja har i løpet av 25 år vorte ein stor aktør lokalt og nasjonalt.

– Me leverer også i Sverige og frå 1. januar i Danmark, seier Skaret.

Den rivande utviklinga betyr også at selskapet må knytte til seg dyktige tilsette.

– Det er viktig å ha gode folk med oss, og me har arbeidd med utvikling. Me har tilsett kompetanse innan kraftforvaltning. Me bygger miljø og kompetanse lokalt.

Lokalt engasjement

– Ustekveikja rundar 25 år no. Kvar går selskapet?

– Me må vidare, seier Skaret.

I den planen ligg mellom anna vidare satsing på smarthusløysingar og dotterselskapet Energiplan som satsar på smarte ladesystem av elbilar og energiøkonomisering for å kutte straumforbruket til kundane. Ustekveikja ønskjer også å vere støttespelarar for utvikling på fleire område i regionen. Gjennom selskapet Bruse, som Ustekveikja eig saman med Hallingdal Kraftnett og Hemsedal Energi, skal fleire og fleire i Hallingdal få fiber.

– Breibandutbygginga er kjempeviktig for Hallingdal og utruleg artig å vere med på, seier Skaret.

– Me sponsar også fleire lag og foreiningar i heile Hallingdal. Som den einaste lokaleigde kraftleverandøren er det viktig å vise at me er med, seier Nesfossen.