Hallingdølen vann seks europeiske prisar
Seks saker frå Hallingdølen var blant vinnarane under European Newspaper Award denne veka.
– Det er moro å bli lagt merke til internasjonalt, seier ansvarleg redaktør Lillian Holden.
European Newspaper Award er ein årleg avisdesign-konkurranse. I år deltok 164 aviser frå 25 ulike land. Hallingdølen vann prisar i seks kategoriar.
Artikkelen held fram under annonsen.
Foto og design
Fotograf Elias Dahlen og grafikar Jarle Stanes stod for to prisar i kategoriane «photography» og «photo-report». Den eine saka var ein reportasje frå ei dalmatinarutstilling på Torpomoen, ein reportasje med inngangen «Det er meir mellom dalmatinarflekkane enn du skulle tru».
Den andre var ein større magasinreportasje på preparant Ole-Reidar Lågrinn.
– Det er gledeleg at den visuelle journalistikken blir lagt merke til. Hallingdølen har flinke grafikarar, som Jarle Stanes, det legg grunnlaget for at Hallingdølen kan hevde seg i denne konkurransen. Det er moro, seier Dahlen.
Hallingdølen stakk av med to prisar i ein spesialkategori for koronaviruset. Grafikar Stanes stod for utforminga av to spesielle sider der journalist Magnus Lindahl hadde laga ei oversikt over kva koronakrisa har kosta kommunane.
Same duo stod og for ei annan prisvinnar-sak, i Feriemagasinet tok journalist Lindahl for seg dei sju dagane som endra Norge. Saka er ei forteljing om kva som skjedde i Hallingdal den veka landet stengde ned. Den strekte seg over 14 sider i magasinet, utforma av Stanes.
Historia om Kinneberg
Hallingdølen vann også pris i kategorien «cover og coverstory» for ei sak om krigaren Torleif Kinneberg, skriven av journalist Emilie Bjella Waaler, med foto av Elias Dahlen.
Den siste prisen vart vunnen i kategorien «picture page» for eit lesarbilete som vart brukt over to sider. Sida kan du sjå her:
