Fryktar regjeringa ikkje forstår konsekvensane av oppsplitting - ber om hastemøte med Støre

14 ordførarar langs Bergensbanen krev hastemøte med statsministeren. Dei fryktar regjeringa ikkje forstår konsekvensane av sitt eige forslag i statsbudsjettet.

Det handlar om Bergensbanen og forslaget om å vrake fellesprosjektet Ringeriksbanen/E16. Regjeringa vil splitte prosjektet og overføre jernbanedelen frå Nye Veier til Bane NOR.

Det kan høyrast tilforlateleg ut, men har dramatiske konsekvensar, meiner ordførarane. I praksis blir prosjektet skrinlagt, fryktar dei.

– Ut frå at heilt avgjerande problemstillingar i forhold til Bergensbanen si forkorting er uavklart eller ikkje godt nok opplyst, ber Forum Nye Bergensbanen om eit snarleg møte med statsminister Jonas Gahr Støre, skriv Voss-ordførar og leiar i forumet på vegner av dei 14 ordførarane.

Dei 14 kjem frå Bergen, Vaksdal, Voss, Ulvik, Aurland, Hol, Ål, Gol, Nesbyen, Flå, Ringerike, Hole, Jevnaker og Bærum. I tillegg er Viken og Vestland fylkeskommunar med.

Temaet om Ringeriksbanen er gjenstand for forhandlingane mellom regjeringa og SV som no er heilt i innspurten.

– Når ikkje fram

Ringeriksbanen/E16 er ferdig utgreidd og klar for bygging. Å splitte opp prosjektet skaper uvisse. Ein ting er at det vil ta lang tid å få prosjektet opp att. Endå verre er det at det kan krevje nye reguleringsplanar viss ein skal fråvike planen for fellesprosjektet. Konsekvensen er at Ringeriksbanen blir skrinlagt, fryktar ordførarane.

– Slik Forum Nye Bergensbanen oppfattar det legg regjeringa til grunn at å splitte prosjektet har små konsekvensar. Vår vurdering er motsett. Det vil ha store konsekvensar og i realiteten føra til ei skrinlegging av Ringeriksbanen, skriv ordførarane i brevet.

Støre-intervju

Bekymringa kjem etter mange uklare uttaler frå samferdselsminister Jon-Ivar Nygård (Ap) og seinast intervjuet med Jonas Gahr Støre i Hallingdølen. Der seier Støre at planlegginga ikkje er bortkasta ved ei oppsplitting. På spørsmål om ei oppsplitting vil føre til nye reguleringsplanar, svarar Støre at det har han «ingen kommentar til».

– Me har eit positivt syn på Ringeriksbanen, og så har me sett han på vent som veldig mange andre prosjekt rundt i landet, uttalte Støre til Hallingdølen.

– Store tekniske utfordringar

Ordførarane meiner ei oppsplitting av fellesprosjektet får langt meir dramatiske konsekvensar. Dei får til dels god støtte frå prosjektdirektør i Bane NOR, Hans-Egil Larsen. Han fryktar Ringeriksbanen blir skuva ut i det uvisse ved ei oppsplitting.

– Ei oppsplitting vil kunne føre til store tekniske utfordringar med fare for nye rundar med reguleringsplanar, seier Larsen. Han har tidlegare konkretisert utfordringa i eit intervju i Hallingdølen. Blant anna er det utfordrande grunnforhold som gjer at dersom ein fyrst bygger veg, kan det bli uråd å kome til i same området med bane seinare. Dermed risikerer ein utfordringar med mogeleg nye trasear og nye reguleringsplanar.

– Katastrofalt

Ein annan som ropar varsku er ordførar i Hole kommune, Syver Leivestad (H). Han minner om at den statlege reguleringsplanen for fellesprosjektet resulterte i ein trase gjennom kommunen, ein kommune rik på både kulturminne og jordbruksareal. Det har alle partar akseptert. Blir det nye rundar med nye reguleringsplanar, blir det stopp i Hole.

– Med ei oppsplitting er nye trasear i spel. Det er katastrofalt for Hole kommune. Den statlege planen er eit gedigent kompromiss. Hole vil ikkje akseptere to trasear. Då blir det folkeopprør. Resultatet blir truleg at ein vel veg og skyt ei kvit pil etter Ringeriksbanen, seier Leivestad.

I så fall er løpet køyrd for visjonen om togtur Oslo-Bergen på ned mot fire timar. Eit klimatiltak som ifølge undersøkingar kan flytte 900.000 passasjerar over frå fly til tog.

I Ringerike kommune er ein også fortvila. Både fordi kommunen har investert 3 milliardar kroner for å tilrettelegge for veksten som kjem med banen. I tillegg bandlegg den vedtekne reguleringsplanen store område i lang tid framover. Men ny uvisse stoppar vidare byutvikling og investeringar.

– Alvoret må søkke inn

Det er dette dei 14 ordførarane vil forklare i klartekst til Jonas Gahr Støre. Ei oppsplitting av Ringeriksbanen kan ikkje foreinast med Støres uttale i Hallingdølen om at Ap «har eit positivt syn på Ringeriksbanen». Ei oppsplitting er «eit teknisk spørsmål i forhold til organisering av sektoren», uttalte Støre til avisa.

Nei, det har mykje meir alvorlege konsekvensar, meiner ordførarane.

– Det alvoret må søkke inn. Dei må vera klar over kva dei no står i fare for å gjera, rett og slett, seier Hans-Erik Ringkjøb.

– Meiner du dei gjer noko dei ikkje veit konsekvensen av?

– Ja, i forhold til det dei seier om at planane om Ringeriksbanen står fast, og at banen ikkje er ute av diskusjonen eller prioriteringane. Då har dei ikkje tatt inn over seg kva som skjer viss dei no held fast ved at dette skal splittast og tilbake til Bane NOR. Då rokkar ein ved heile plangrunnlaget som ligg der. Det treng me å fortelje dei ein gong til.

– Det er ikkje de som overspelar då?

– Nei, det meiner eg absolutt ikkje. Me veit kor lang tid det tok å få på plass ein reguleringsplan for prosjektet. Det er eit gedigent kompromiss. Å skulle begynne på det på nytt igjen, då veit me at det er så langt fram, at det er ikkje å overspela. Det er realiteten, seier Ringkjøb.

Bekymringa er også knytt til at regjeringa ikkje har lagt inn planleggingsmidlar til K5 Bergen-Voss.