«Du er gjenstand for flere rettssaker for besittelse av barnepornografi ...»: – Dette er heilt klart fake
Inger-Brit Vindegg gjennomskua e-posten raskt, men lurer på om det er mange andre som har fått den same.
– Nei, eg vart ikkje skremd. Eg såg med ein gong at det var noko galt, seier Inger-Brit Vindegg på Ustaoset.
Politidirektør Olafsen
Sundag kveld tikka meldinga inn på e-posten hennar. Avsendar var politidirektør Arne Jørgen Olafsen, ein person som etter litt undersøking viser seg ikkje finst. E-postadressa var også suspekt: politiavdelingen@gmail.com.
Artikkelen held fram under annonsen.
«Vi kontakter deg etter databeslag av cyber-infiltrasjon. Du er gjenstand for flere rettssaker for besittelse av bilde Barnepornografi - Cyber pornografi - Barnekriminalitet. IP-adressen din har blitt målrettet av en Internett-undersøkelse utført diskret av sensuroverholdelsesenheten til ditt lands innenriksdepartement», heiter det i teksten.
Vidare står det at ein har fleire bevis på lovbrot, og at avsendaren må gi sine grunngjevingar for tiltalen ved å svare på e-posten.
«Dette innen en streng periode på 72 timer», heiter det. Vidare kan det vente både arrestordre og eksponering i media. «Du vil bli registrert som seksualforbryter på slutten av nevnte prosedyre. Du blir nå advart», står det i brevet frå politidirektør Arne Jørgen Olafsen med både PST-logo, riksløva og norsk flagg
– Forsøk på svindel
– Ja, det er nokre som har kontakta oss etter å fått slike e-postar, seier politistasjonssjef i Hallingdal, Brit Fyksen.
Ho understrekar at Arne Jørgen Olafsen IKKJE er politidirektør.
– Dette er forsøk på svindel. Politiet sender aldri sensitiv informasjon på e-post, og politiet brukar domenet politiet.no, presiserer ho.
Kan ende i bedrageri
Brit Fyksen seier det er viktig at folk er kritiske, gjer undersøkingar og IKKJE svarar eller oppgir personleg informasjon.
– Her blir ein invitert til noko som potensielt kan bli eit problem og ende i bedrageri. Dette er heilt klart fake, seier Brit Fyksen.
Artikkelen held fram under annonsen.
Viss ein svarar og gir frå seg sensitive opplysningar, kan desse i neste omgang bli nytta for utpressing.
Det skjer ofte
Inger-Brit Vindegg skjønte med ein gong at dette var tull og tøys.
– Eg såg det på tittelen: Til din oppmerksomhet, på formuleringane og adressa. Men dette skjer så ofte, folk gir seg ut for det eine og det andre. Denne var lett avsløre, ja, nesten litt «morsom», men andre kan vera vanskelege. For eksempel folk som gir seg ut for å representer posten eller banken, seier Inger-Brit Vindegg.
