Bankane slår seg saman

Forstandarskapa i Sparebank 1 Hallingdal og Øystre Slidre Sparebank gjekk samrøystes inn for samanslåing.

Like før jul skreiv Hallingdølen at styret i begge bankane gjekk inn for planane om å etablere ei banksamanslutning på tvers av dalføra. Før helga vart planane lagt fram for forstandarskapa i dei to bankane.

Dei gjekk samrøystes inn for å fusjonsplanane. Bankane vil no søkje om godkjenning frå Finansdepartementet, Finanstilsynet og Konkurransetilsynet. Det er venta at dei nødvendige godkjenningane kan vere på plass innan 1. juli

Fleire avdelingskontor i Valdres

Øystre Slidre Sparebank er ein Terrabank, mens banken i Hallingdal er knytt til Sparebank 1. Styret gjekk inn for at den nye banksamanslutninga skal stå i Sparebank 1-alliansen.

Forstandarskapa vedtok at den nye banksamanslutninga skal få namnet Sparebank 1 Hallingdal Valdres.

Øystre Slidre Sparebank har hovudkontor på Heggenes og ei avdeling på Beitostølen. Med ei samanslåing vil valdrisane få ein bank som er sterkare til stades i lokalsamfunnet. Sparebank 1 Hallingdal har allereie ei avdeling på Fagernes, i tillegg til kontora på Geilo, Ål, Gol og Hemsedal.

Allmennyttige føremål

Det vil bli oppretta to stiftingar – ein for kvar av dei to bankane.

Stiftingane får innverknad i den fusjonerte banken som eigarar av eigenkapitalbevis. Utbyttet skal stiftingane nytte til allmennyttige føremål i lokalmiljøa.

Dei to bankane er ulike i storleik og volum. Med ein forvaltningskapital på 5,7 mrd. og ein eigenkapital på 852 mill., er Sparebank 1 Hallingdal den klart største banken. Til samanlikning har Øystre Slidre Sparebank ein forvaltningskapital på 0,8 mrd. og ein eigenkapital på 105 mill.

Ut frå ei verdivurdering av dei to bankane, har partane blitt samde om at Sparebankstiftinga Øystre Slidre skal ha ein eigardel på 11,5 prosent og Sparebankstiftinga Hallingdal skal ha ein eigardel på 88,5 prosent i den samanslutta banken.