24 smitta på 10 dagar: - Mange ukjende smittevegar

14 av dei 24 som har fått koronaviruset i Ål dei siste 10 dagane er elevar ved Ål ungdomsskule.

– Dei er delt på alle trinn. 9. trinn er no ute av karantene. På dei to andre trinna er det såpass mange ukjende smittevegar at me har valt å halde alle i ordinær karantene, fortel kommuneoverlege Toril Bøyum.

– Med mange ulike smittevegar, trur de det er skjult smitte i Ål-samfunnet no?

– Me har ein mistanke om det, seier Bøyum.

Sundag kveld tikka det inn to nye positive prøvesvar. Det gjer at kommunen no er oppe i 24 på berre 10 dagar.

– Dei to er kjente nærkontaktar. Ein klasse ved Ål vidaregåande og ein klasse på Nedre-Ål skule er i karantene. Det blir utstrakt testing måndag, seier kommuneoverlegen.

Ål har hatt nok å henge fingrane i den siste veka; smitta som har spreidd seg særleg blant ungdommen har gjort at svært mange har vore nøydd til å teste seg.

For å vareta smittevernet å best mogleg måte, bestemte kommunen seg i helga for å setje skulane og barnehagane i Ål på gult nivå.

Det betyr mellom anna digital heimeundervisning for heile ungdomsskulen, og redusert opningstid i barnehagen.

– Vurderinga vår er at ungane kan ha ein god skulekvardag på gult nivå, samtidig som det avgrensar konsekvensane av smitte for barn, familiar og helsevesen, seier Bøyum.

– Me prioriterer med det også at fritidsaktivitetar går som normalt, men sjølvsagt med fokus på godt smittevern.

Totalt er 39 personar smitta i Hallingdal dei siste to vekene. Dei 39 smitta fordeler seg slik:

Gol: 10

Ål: 24

Hemsedal: 1

Hol: 2

Nesbyen: 2