Olsok-konsert i stavkyrkja
Lokale musikarar er med å markere olsok i Torpo stavkyrkje. 27. juli blir det konsert.
– Det er viktig at me har lokale krefter som opptrer frå tid til annan. Det har me fått til i år, seier Jorunn Eidsheim Wiik, leiar i Buskerud fortidsminneforeining som tek hand om Torpo stavkyrkje.
Folk og barokk
I år er det ålingane Tove Bøygard (vokal) og Bjørn Kvinnegard (munnharpe) som skal halde den tradisjonsrike olsokkonserten i stavkyrkja. Dei to har opptredd saman tidlegare, og på Torpo skal dei framføre musikk som går i retning både folkemusikk og barokk kyrkjemusikk. Konserten har i mange år blitt arrangert i samarbeid mellom fortidsminneforeininga og kyrkja, og normalt sett finn han stad etter olsokmessa og kyrkjekaffien. For å få det til å klaffe med artistane, blir konserten i år litt i forkant av sjølve olsok.
Artikkelen held fram under annonsen.
– Men Bjørn Kvinnegard kjem også til å opptre under olsokmessa sundag, seier Wiik.
Ja-stemning
Leiaren i fortidsminneforeininga har berre hatt gode opplevingar med å arrangere olsokkonserten dei tretten åra ho har bidrege, og ho fortel at det er ein veldig ja-stemning for stavkyrkjer blant artistane som blir spurt om å opptre.
– Akustikken er veldig god i desse bygningane og stemninga blir god. Eg trur konserten i Torpo stavkyrkje ofte gir ei dobbel oppleving. Kyrkjebygget i seg sjølv er så fantastisk berre å vere i, med ni meter høge stavar og kvelvet over der att, og så kjem musikken i tillegg, seier Wiik.
