Horn opnar ny Nesch-utstilling
Måndag 3. november opnar ei ny utstilling av Rolf Nesch sin grafikk frå teaterlivet i Nesch-museet i Ål.
Utstillinga femnar om både teikningar, litografi og metalltrykk frå perioden 1946 til 1950. Det var også i dei åra den tysk-norsk kunstnaren for alvor slo rot i Norge.
Frå Oslo til Ål
Med den nye grafikken frå teaterlivet vann han også attende den kunstneriske posisjonen sin i Tyskland. Samstundes hadde han suksess med utstillingar i både New York og andre byar i USA.
Artikkelen held fram under annonsen.
Då Rolf Nesch flytte frå Oslo til Ål i 1951, var det altså ein kjend og aktiv kunstnar som slo seg ned her.
Teikningar og skisser
I utstillinga som opnar i Ål om knappe to veker syner Rolf Nesch både som nyskapande grafikar og som kunstnar med særskilde interesser for teater. I tillegg blir det vist fram mange av dei teikningane og skissene som han laga frå desse førestillingane.
Utstillinga opnar same dag som Riksteateret spelar førestillinga «Litt av eit par» i Ål kulturhus. Det er eit samantreff som ikkje er heilt tilfeldig. På utstillinga kan du sjå korleis Nesch fylgde Det Norske Teatret gjennom det krigsherja Finnmark i 1947. På førestillinga skal også tidlegare kulturminister og noverande teatersjef på Riksteatret, Ellen Horn, vera. Ho vil i den samanheng opne Rolf Nesch-utstillinga, skriv Nesch-museet i ei pressemelding.
