Frydefull time med Borgar

Borgar Storebråten og venene hans kan kunsten å underhalde på ei scene. Snart kjem dei på plate også.

Det er iallfall planen. Men som Borgar Storebråten seier:

– Eg har arbeidd med plata i seks år.

Plata snart klar

26-åringen frå Gol har satsa på musikken lenge.

Ikkje berre har han lagt ned eit stort arbeid i låtskriving. Satsinga kostar også i kroner og øre. Men han meiner «det er for seint å snu no». Og til våren skal ein singel sleppast ut i marknaden. Til hausten kjem plata. Plata er spelt inn på Svenkerud hjå Tor Magne Hallibakken og i Nashville, Tennessee, USA. Opphavleg var planen å gi ho ut i fjor haust.

– Ting set seg no. Me var ikkje fornøgde, så me utsette utgjevinga til me var fornøgde. Eg trur det har gjort plata godt å vente seks år, seier Storebråten.

– Triveleg

Golingen er lærarutdanna og arbeider til dagleg ved Viken folkehøgskole.

Men bortsett frå lærargjerninga, ønskjer han å ta musikken så langt han kan. Og sjølv om plata enno ikkje er ute i handelen, har det vore jamleg med spelejobbar.

– Du sa for to år sidan at målet var å spele så mykje at du vart lei eigne låtar? Korleis har det gått?

– Me har spelt ein del ute. Men målet er å spele meir. Eg er nok ikkje lei låtane, men det trur eg er greitt.

Han hausta lovord for konserten på Fryd i Ål laurdag ettermiddag. Saman med Martin Johannessen (tangentar), Øyvind Ekse (gitar) og Sandra Erstad (vokal) skapte han god stemning denne førjulslaurdagen.

– Fint å gjere slike konsertar. Det blir som i ei stove. Triveleg å spele her, seier Borgar Storebråten.

Og det meinte dei som gjekk fornøgde heim også.