Ekte danseglede på ungdomskurs

Rundt 75 ungdommar fylte helga med dans og folkemusikk då dei deltok på Storhelg i Hallingdal.

– Høgre, venstre, saman. Høgre, venstre, saman. Det kokar på dansegolvet på Hugnadheim på Torpo når Silje Risdal Liahagen, Margit Myhr og Vetle Springgard instruere i hallingspringar med to følgje. Så stor er interessa at ivrige ungdommar må danse på skift. Det nærmar seg matpause og den krevjande rundsnuen står for tur.

– Det går dobbelt så fort når det er tre som når det er to, det er det som er artig, oppmuntrar Margit Myhr.

Populært kurs

– Folkedansen er spennande og sosial, tykkjer dansarane Ingvild Aavitsland (14) frå Oslo og Herborg Oma (15) frå Hamar. Jentene har blitt kjent gjennom «Bygda dansar» og har gledd seg til Storhelg i Hallingdal.

Frå å starte med i underkant av 50 deltakarar i fjor kom rundt 75 folkemusikk- og folkedansinteresserte til årets festival. Med Hugnadheim som hjarte tok initiativtakar Martin Myhr også i bruk både Torpo skule og Ål kulturhus til kurs, konsertar og overnatting.

– Folkedans er kult

– Mange ser rart på meg når eg fortel at eg driv med folkedans, seier Herborg, men det er fordi dei ikkje veit kva det er. Ho dansar alt frå ballett og musikaldans og til breikdans og hiphop, men avviser at folkedansen blir traust og kjedeleg samanlikna med andre sjangrar:

– Absolutt ikkje, du kan gjera mykje ut av ein vals eller ein reinlender, meiner dansaren.

Venninna Ingvild har dansa folkedans sida ho var lita, og likar at det er gode tradisjonar som står seg, og ikkje berre er ein koreografi du gløymer rett etter du har lært han.

– Og så er musikken så fin, og heng så godt saman med dansen, tykkjer ho. Ingvild set også pris på det sosiale, og kontakten du får med andre gjennom dans. Under Storhelg i Hallingdal har ho blitt kjent med folk frå store delar av landet.

Imponerte

Når Hallingdølen møter jentene har dei nettopp avslutta den lange øykta med hallingspringar.

– Favoritten min er nok framleis pols, men springar er artig og går fort, smiler Ingvild. Når dei heilt på slutten får lære varianten med to følgje er det viktig å halde tunga rett i munnen, men instruktørane Silje Risdal Liahagen, Margit Myhr og Vetle Springgard er strålande fornøgde med innsatsen:

– Få hadde dansa hallingspringar før, så det var artig, tykkjer Margit Myhr.

– Ungdommane er flinke og interesserte, supplerer Silje Risdal Liahagen. Også spelemann Thorleif Stave er imponert etter å ha sett ungdommane danse i over to timar:

– Utruleg bra. Dei er så unge og flinke, dette var moro. Stave er overtydd om at det var mange framtidige kappleiksstjerner i aksjon under kurset i helga.

Fornøgd arrangør

Festivalen Storhelg i Hallingdal vart ein suksess, med over 80 deltakarar på kurs i dans, song og spel på hardingfele, torader og munnharpe.

– Mykje moro og lite søvn, oppsummerer initiativtakar Martin Myhr. Her er imponert både over ungdommane som deltok og ikkje minst alle som stilte opp på dugnad natt og dag.

Den store og rusfrie dansefesten på Hugnadheim på Torpo laurdag kveld hadde kokande fullt dansegolv frå fyrste til siste dans.

– Det er den beste dansefesten på Hugnadheim så lenge eg har budd her, meiner Myhr.

Ikkje berre var han ansvarleg for kursa og konsertane, Myhr tok også imot ein delegasjon på ti kulturbyråkratar frå Litauen som skulle sjå korleis ein førar tradisjonane vidare i Hallingdal. Dette er del av ein EU-prosjekt mellom kulturinstitusjonar i Litauen og Buskerud fylkeskommune.

Trass i ei hektisk helg, kjenner Myhr alt no at han har lyst til å halde ny Storhelg i Hallingdal neste år.