Hyttefolk reiser heim - men det går seint i Hol

I løpet av dagen tysdagen vart folketalet i Hallingdal redusert med 4000 personar.

Dei fyrste meldingane gjekk på at folketalet var redusert med 9000 i løpet av dagen. Dette vart korrigert dagen etter, til 4000.

Tysdag klokka 15.00 var samla folketal i Hallingdal 32.515. Klokka 09.00 var talet 36.618.

Onsdag morgon viste målingar same antal folk som tysdag ettermiddag:

Hol: 7773

Ål: 6529

Hemsedal: 4782

Gol: 6497

Nesbyen: 4805

Flå: 2407

Er tala riktige?

Hallingdølen har i løpet av dagen fått fleire spørsmål frå folk knytt til teljinga. Er tala korrekte? Blir det for eksempel også talt SIM-kort som sit i hytter som ikkje er i bruk? Tala bygger på registrering av talet på mobiltelefonar.

Beredskapsrådgjevar Espen Bille-Larsen seier at tala ikkje berre inneheld fastbuande og hyttefolk. Målinga fangar også opp folk som er i Hallingdal av andre grunnar; sesongarbeidarar som ikkje har meldt flytting, handverkarar som er her på arbeid i kortare periodar, folk som er på besøk og som er på gjennomreise.

– Det bur ca. 21.000 i Hallingdal. Målingane syner kor mange som er her i det øyeblikket målinga blir gjort, forklarar Bille-Larsen.

– Blir også SIM-kort, for eksempel i tomme hytter, teke med i teljinga?

– SIM-kort i installasjonar blir registrert, men merka med avvik og trekt frå i dei tala me går ut med, forklarar Espen Bille Larsen.

Kor mange på hyttene?

Det er uråd å spesifisere kven personane er og kva dei gjer her.

– Det kan godt vere pluss minus 200-300 i kvar enkelt kommune. Dette er ikkje millimetermåling. Det er heller ikkje det avgjerande. Me måler dette kvar dag heile året, og det er totalbiletet som er viktig. seier han.

– Men de kan ikkje slå fast kor mange av dei som er her som bur på hytte?

– Nei, det kan me ikkje. Poenget er likevel at i den situasjonen me er i, så er det for mykje folk i Hallingdal sett opp mot dei ressursane helsevesenet rår over. Sjølv om me ikkje kan fastslå talet på hyttefolk, så veit me det er mange. Ein rask køyretur i hyttefelt her i Hol fortel oss at det framleis er mange folk på hyttene. Det kan det ikkje vere no, seier Espen Bille-Larsen som viser til helseministeren som i dag presiserte behovet for at hyttefolk reiser heim.

Bent Høie sa at kommunane ikkje skal gi dispensasjon til hyttefolk som ber om å få bli. Slik situasjonen er no, skal hyttefolk reise heim, var bodskapen frå helseministeren.