Siger i sesongavslutninga

Vetle Sjåstad Christiansen vann fellesstarten under norgescup-avslutninga i Trondheim laurdag.

Juniorane avsluttar sesongen med norgescupfinalar denne helga, medan seniorane har sitt norgesmeisterskap.

Hallingdal sin for tida beste skiskyttar, Vetle Sjåstad Christiansen frå Geilo, sto for den beste lokale prestasjonen i Trondheim.

I klasse 20-21 vann han med 12 sekund foran andremann, Asbjørn Wold frå Vik IL.

I same klasse vart Pål Kristian Grue Tufte nummer 12.

Elles vart det ein dag med hallingresultat midt på lista. I yngste guteklasse, M17, vart geilingane Martin Bårtveit nummer 19 og Jonas Dokken nummer 28. I K19 vart Anne Marte Løvstuen nummer åtte med totalt seks strafferundar.

Senior

Hallingdal var representert med fire utøvarar i Norgesmeisterskapet for senior.

I kvinneklassen vart Geilo-løparane Karianne Grue Tufte nummer 14 og Ane Sandaker Kvittingen nummer 16 på fellesstarten. Tora Berger vann klart.

Dei to hallingane i herreklassen tok dei to siste plassane. Lars Sandaker Kvittingen frå Geilo og Tor Arne Skråmestø frå Ål vart henholdsvis nummer 56 og 57. Her vann Rune Brattsveen suverent.