Dansarar i fullt firSprang
Tysdag kveld innvia dei fyrste dansarane den nye landsdelsscena, Sprang, i Ål kulturhus.
Åtte-ti ivrige dansarar stiller seg pent på rekkje, klare for å vise seg på matta. Gjennom kurset «Lealaus» tek instruktørane og dansarane Mikkel Aasberg Arnesen og Henrik Opheim Berg elevane gjennom både lausdans og akrobatikk.
På plass i ny sal
Deltakarane er seks-ti år gamle, og høveleg energiske. Tysdag kveld fekk dei prøve seg i Ål kulturhus si nye storstove for fyrste gong. Rett nok manglar det framleis nokre få detaljar før alt er heilt på plass, men elles er den nye landsdelsscena for dans (Sprang) no klar for bruk.
Artikkelen held fram under annonsen.
– Den nye salen er heilt super. Her er det både bra med plass, lyd og lys. Alt i alt ein bra stad å drive dans og akrobatikk, seier instruktørane.
Instruktørane gjev beskjed om at siste runde blir valfri - og etter å ha tenkt seg kjapt om kjem elevane susande nedover matta ein etter ein. Somme prøver seg på stiften, medan andre kjempar seg opp i hovudståande.
Har fleire bruksområde
Den nye scena skal etter planen brukast av utøvarar frå heile landet - frå lokale ferskingar, til tilreisande proffar. I tillegg til førestillingar, skal Sprang også brukast til utleige, produksjonar og kursing. Til dømes kan scenekunstnarar bruke både scena og tilhøyrande øvingsrom for å sette saman og øve inn ulike produksjonar. Margit Myhr er fyrst ut til å bruke nybygget til nettopp dette. Ho brukar i desse dagar Sprang i arbeidet med førestillinga «Sviv», som også er eit samarbeid med Riksscenen i Oslo.
