Tok gull og bronse i KM
Juniorgutane frå Hemsedal tok gull og jentelaget til Fjellet bronse i stafett-KM i langrenn.
Langrenn: Ringkollen Skiklubb arrangerte Ringkollstafetten med innlagt kretsmeisterskap for Buskerud vesle nyttårseftan.
Rennet var flytta til Trossviksætera på grunn av lite snø på Ringkollen.
Artikkelen held fram under annonsen.
Gull til Hemsedal
Hallingdal var godt representert med ni tremannslag. Det var småklubbane Hemsedal, Fjellet og Bromma som kjempa i toppen og henta medaljar.
Beste prestasjonen stod juniorane frå Hemsedal for og gjekk heilt til topps.
Vetle Flaget gjekk fyrste etappe og veksla som nummer tre. Jakob Mestvedthagen avanserte til delt fyrsteplass på andre etappe. Ankermann Ola Jordheim tok godt vare på teten og gjekk Hemsedal inn til gull, 42 sekund før sølvvinnar Konnerud og ytterlegare 11 sekund før bronsevinnar ROS.
Juniorlaget til Gol vart nummer sju av 12 lag.
Bronse til Fjellet
KM-medalje vart det også til jentene frå Fjellet i klasse 13–16 år.
Trioen Mari Torsteinsrud, Sigrid Haug Grønnerød og Vilde Veslegard tok bronse. Dei vart klart slått av Konnerud og Vikersund, men gjekk inn til ein klar tredjeplass, nesten to minutt før lag nummer fire. Bromma vart nummer sju.
Gutelaget til Bromma (13–16) var 12 sekund frå medalje, men måtte nøye seg med den «sure» fjerdeplassen. Også det er imponerande av ein liten klubb i konkurranse 26 lag.
Fjellet vann klasse Mix 11–12 ved Narve Veslegard, Tord Torsteinsrud og Gro Torsteinsrud i konkurranse med 12 blandingslag. I denne klassen blir det ikkje kåra kretsmeistrar.
