To omkom i Hallingdal

13 mista livet i Buskerud-trafikken i 2011.

Ein svensk bilist omkom då han køyrde av Rv7 i Kvislabakkane i Hol 15. august. 22. februar døydde ein fransk MC-førar då han kolliderte med ein møtande bil på Rv7 ved Engene i Gol.

Desse ulykkene i Hallingdal er to av 13 dødsulykker i Buskerud i 2011.

To færre mista livet på Buskerud-vegane i 2011 samanlikna med året før.

Stor nedgang

Tal frå Trygg Trafikk syner at 171 personar omkom i vegtrafikken i Norge i fjor. Dette er det lågaste talet sidan 1953.

Dei siste tre åra har det døydd færre på vegane for kvart år. I 2011 gjekk 37 færre liv tapt enn i 2010. Går ein attende til år 2000, døydde heile 341 personar på norske vegar. Tala er dermed halvert.

Verst på E16

I Buskerud skjedde det flest dødsulykker på E16. Der omkom fem personar i fjor. På Rv7 var det to dødsulykker, der båe skjedde i Hallingdal.

Årsaka til at den franske MC-føraren i 50-åra omkom ved Engene i februar var at han velta, kom over i motgåande køyrefelt og vart treft av ein møtande bil. Politiet opplyste at det var glatt veg, og at motorsyklisten køyrde i eit spor og fekk sleng. Han hadde piggdekk på sykkelen, og køyrde ikkje fort.

Det var ingen andre køyretøy involvert då den svenske bilisten i 20-åra køyrde rett utom vegen i Kvislabakkane og døydde i august.