– CT-maskinen er ingen omveg

– CT-maskinen har vore eit veldig framsteg for pasientar med hjerneslag i Hallingdal. Det har redda mange millionar hjerneceller.

Det seier Oddmund Nestegard, avdelingssjef og medisinsk fagsjef på Ringerike sjukehus.

Vegval: Ål eller Hønefoss?

Palmelaurdag fekk Albert Tobiassen Nesland hjerneslag mens han var på jobb i skiheisen i Skarslia. I ettertid angrar han på at han tok «omvegen» om CT-maskinen på Ål. Nesland meiner han at han hadde vunne verdifull tid på å køyrd rake vegen til Ringerike sjukehus.

– Eg kjenner ikkje kva som har skjedd og kva vurderingar som er gjort i dette konkrete tilfellet. Eg må nøye meg med å kommentere på generelt grunnlag, seier avdelingssjefen på Ringerike sjukehus.

Med og utan kontrastveske

Nestegard seier CT-maskinen har vore eit stort framsteg for hjerneslagbehandlinga i Hallingdal.

– CT-maskinen er ei solskinshistorie. Før maskinen kom i 2016, måtte alle hallingar til Hønefoss ved mistanke om hjerneslag. Me fekk denne maskinen for å vinne tid. Viss me finn blodproppen, kan me starte trombolysebehandling i Hallingdal. Då sparar me halvannan time. Det betyr mykje, seier han.

Nestegard stadfestar at dei ikkje kan utnytte det fulle potensialet til CT-maskinen i Hallingdal så lenge det ikkje er radiografar på vakt som kan køyre CT-skanning med kontrastveske.

– Men også utan bruk av kontrastveske, gir CT-maskinen verdifulle svar. Me vil kunne sjå om det er bløding eller ikkje, og oftast også sjå om det er eit infarkt.

For smått til å ha døgnberedskap

– Kva seier du til kritikken om at helsevesenet er i feriemodus når folketalet blir mangedobla?

– Hjerneslag er sjeldan, sjølv med eit så stort pasientgrunnlag som det var i Hallingdal i påsken. Me har ikkje nok fagpersonar til at me kan klare å lage ei 24/7-vaktordning. Det er berre halvtanna årsverk med radiografar på Hallingdal sjukestugu. Og det er uråd å lage døgnberedskap på eit så lite fagmiljø, seier Nestegard. Han meiner nyordninga, der ambulansemannskap opererer CT-maskinen med støtte frå ekspertar på videolink, gir ei god løysing.

Har tru på systemet

– Det sikrar at CT-maskinen kan brukast heile døgnet, men utan kontrastveske, vel å merke. Eg har veldig tru på dette systemet. Alle pasientane med slik problemstilling blir overført til Ringerike sjukehus der dei kan følgje opp med MR eller ta nye CT-undersøkingar med kontrast. Me må heile tida evaluere korleis det fungerer, og i det perspektivet er erfaringane til denne pasienten verdifulle, seier han.

Nestegard fortel at ein overlege på Ringerike sjukehus no jobbar med ein doktorgrad om den desentraliserte CT-maskinen på Hallingdal sjukestugu.