Bottolfs opna galleri og atelier
– Her er eg min eigen sjef. Det er ei fin stilling å ha, seier Ole Anders Bottolfs.
Torsdag hadde kunstnaren vernissage i sitt eige galleri, Galleri Bottolfs i Gol.
Kvite ark og fargestiftar
Då Gol kunstforeining fekk seg nye lokale, fekk Ole Anders Bottolfs lov til å ta over kjellaren i Helselagsstugu. Romma er pussa opp og har fått kvite veggar, lysegrå golv og betre lys.
Artikkelen held fram under annonsen.
– Det er klart det påverkar arbeidet mitt at eg har fått betre arbeidsforhold, seier Bottolfs.
På dei nymåla veggene i atelieret heng det førebels mest tomme rammer. Her er det som i prøysenvisa – kvite ark og fargestiftar til.
Luftavkjølt
Mange hallingar kjenner Bottolfs som dekormålar. Det er han som sett motiv på veggene både i Gol bakeri, Nystølkroken kafe og mange andre stader. Han jobbar med både blyantteikningar, oljemåleri, treskjering, akvarellar og pastell. Han er også ei fantasifull oppfinnar. I atelieret står modellen av ei maskin som er den reine Aukrust-konstruksjonen.
– Dette er ein Gunda 1920-modell. Ein firesylindra, bensindriven frisørmaskin med luftavkjøling, fortel kunstnaren.
Glamourmodell møter Jesus
Opningsutstillinga i det nye galleriet har han saman med Knut Renslemo. Det er ei stor breidde i dei to kunstnarane sine uttrykk. Bottolfs stiller ut både blyantteikningar, sjølvportrett i Rembrandt-stil og store oljemåleri med vikingmotiv. Han har også hengt ein lekker glamourmodell på veggen. Renslemo er meir nøktern i motivvalet – stilleben, dyreportrett og jesusfigurar.
