Elva har teke museumsbrua - kommunen varslar meir evakuering

Vatnet stig og stig i Nesbyen. – Det blir meir evakuering, seier ordførar Tore Haraldset.

Rett før klokka 15 kom det også melding om at brua over Rukkedøla ved Hallingdal museum har forsvunnen. Vassmassane i Rukkedøla har knust brua.

Sjå vidoe over

Utover føremiddagen har vatnet halde fram med å stige i Hallingdalselva ved Rv7. Vasstanden på marknadsplassen har auka dramatisk i løpet av få timar.

Klokka 13 vart det mål 777 m³/sekund ved målepunktet i Hallingdalselva på Bergheim i Ytre Nes. Klokka 14 hadde dette stige til rett over 800. 50-årsflaum er venta ved 980 m³.

I Rukkedøla gjennom sentrum går vatnet på nivå med tiårsflaum mens regnet auser ned.

No kryp vatnet oppover Stasjonsvegen og fløymer inn over jorde og næringsarealet der YX og Coop driv. Fleire bustadhus er råka.

– Me har kontroll

Tysdag ettermiddag blir det derfor sett i verk evakuering.

– Me ser på dette no, seier Haraldset.

– Blir det evakuering eller kan det bli?

– Me må ta stilling til meir evakuering no, ja. Det er i Stasjonsvegen det gjeld.

– Får dei tilbod om hotell?

– Ja, men dei fleste vil ordne dette sjølv. Men me har sjekka ut at det er god kapasitet i kommunen viss det er behov.

Haraldset seier vatnet også kryp sjeldan langt opp i Steinmogutu, eit anna bustadfelt.

– Ingen skal føle seg redde. Me har kontroll. Men me må evakuere. Det er betre å ta det for tidleg enn for seint.

Plutseleg stigning

Flaumen har eskalert time for time i Nesbyen tysdag. Klokka 6 stengde kommunen Hajembrua i sentrum på grunn av Rukkedølas storleik.

I 10-tida vart Rv7 stengt. Og sidan har vasstanden auka.

I Coop-butikken ved riksvegen har Knut Roar Rukke Gjeitsund og Line Holst merka det.

– Ved sjutida var det berre ein dam her. Men frå 8.30 og utover har det verkeleg auka, seier dei.

Vatnet skvulpar på trappa til inngangspartiet. Enn så lenge var butikken open, men kundane var få.

– Me har lempa varer så høgt opp frå golvet som mogleg. Inngangen skal sperrast og elbilladarane vart kopla frå før i dag, fortel dei.

– Ta det med eit smil

Ordførar Haraldset merkte seg også kor raskt flaumen utvikla seg utover dagen.

– Me såg korleis vatnet steig då me var nede ved Hallingdalselva. Det er tydeleg at det er den som aukar mest.

Skadeomfanget er førebels ukjend, men det er no fleire kjellarar fylt av vatn i tillegg til skadar på vegar.

– Har stenginga av Hajembrua skapt trøbbel?

– Nei, eg føler innbyggarane har forståing for dette. Men eg ser det jo sjølv. Når eg skal heim, må eg køyre om Svenkerud, seier Haraldset.

På Coop-butikken er det ikkje anna å gjere enn å akseptere av naturkreftene bestemmer.

– Me må ta det med eit smil. Så får me sjå om me får tak i ein bil og kjem oss heim att.