Fylkesvegen har vore stengt sidan 14. november: – Kva skjer?

14. november vart Fv40 gjennom Numedal stengt. To og ein halv månad seinare må folk framleis ty til omkøyringsvegen.

Fyrst vart det meldt at fylkesvegen skulle opnast att 1. januar. Så kom ny melding om 1. februar. No er det snakk om 31. mars, tre månader lenger enn fyrst antatt.

– Kvifor tek det så veldig mykje lenger tid enn opphavleg planlagt, spør ein Hallingdøl-lesar frå Nore og Uvdal.

Vegarbeidet går føre seg ved Steinkloppbekken på grensa mellom Rollag og Flesberg.

Freda anlegg

Seksjonsleiar for drift og vedlikehald i Viken fylkeskommune, Bjørn Nyhus har svaret:

– Det blir restaurert ein steinkulvert som går under Fv40 og Numedalsbanen. Banen er freda; derfor blir også steinkulverten omfatta av dette. Det er rett og slett ein tidkrevjande jobb, fortel Nyhus.

Steinkiste

Det er ikkje berre å grave opp kulverten og erstatte den med ei ny, solid stikkrenne. Byggverket skal plukkast ned og byggast opp att. Lokalt blir slike steinkulvertar kalla steinkiste.

Kulverten er 38 meter lang, 2,85 meter høg og 1,45 meter brei. Botnen på kulverten ligg ni meter under asfalten på Fv40. Han vart bygd til Numedalsbanen som vart opna i 1927 og er ein del av kulturminnebestanden langs Numedalsbanen.

Knekte steinar

Det er med andre ord eit omstendeleg arbeid som har halde på sidan 14. november.

– Me visste ikkje kor omfattande arbeidet ville bli før me avdekte kulverten. Det var knekte steinar i konstruksjonen, og eit meir krevjande arbeid enn fyrst tenkt, seier Bjørn Nyhus.

Det er Bane NOR som kostar utbetringsarbeidet.

I tillegg til utbetring av den gamle kulverten, blir det lagt røyr med diameter 1800 mm ved sida, og litt høgare i fyllinga for å vareta omsynet til flaum og avrenning.

Opning til vinterferien

Nyhus fortel at dei no er ferdig med å reparere kulverten. Lekkasjen er tetta og arbeidet med å fylle på att har starta.

– Planen er å asfaltere i veke sju, det vil seie midt i februar. Me tek sikte på å opne vegen til vinterferien i veke åtte, seier Nyhus.

Det kan med andre ord bli opning tidlegare enn det som sist er varsla.

I perioden arbeidet har gått føre seg, har bilistane vorte omdirigert til Fv2782 på andre sida av elva, mellom Flesberg og Djupdal. Dette er ei strekning på 13,8 kilometer.