Fleire hundre møtte opp på jonsokfeiring ved elva: – Det er ein fest å sjå dikko

Ålingane sette stor pris på jonsokfeiringa torsdag kveld. Og for ein perfekt arena!

Elvelangs, stigen som strekkjer seg frå Hallingdal Feriepark, via idrettsanlegget på Bråta, langs Oppsjø og heilt ned til Ål Camping var full av folk torsdag ettermiddag. Alle var dei på veg ned til området ved Ål Camping.

Elvelangs i Ål og Sundre Vel inviterte til jonsokfeiring med hemmeleg program.

Jonsokfest

Det fine med Elvelangs, er at gangvegen er tilpassa rullestolbrukarar.

Småbarnsforeldra møtte opp til aktivitetar for borna ein time tidlegare. Klokka 18 var det store neset fylt av fargeglade og sommarkledde folk. Med temperaturar godt over 20 grader, inviterte til sommarfeiring for mange.

Ny scene i Ål

Med naturen som scene hadde initiativtakarane funne rette plassen. Eigar av Ål Camping og leiar av Elvelangs kunne knapt hatt ein betre ide - enn å leggje jonsokfeiringa her.

– Me har budd i Ål i 50 år, men det er fyrste gong me opplever ei så stor arrangert jonsokfeiring. Dette er flott, seier Tordis og Atle Fosse. Dei kom nett frå Vestlandet der vêret var meir rufsete. No er det berre herleg å sitje ute og sjå folkehavet. For det er mest eit folkehav der på andre sida av vatnet.

Huldra og spelekvinner

Programleiar Arnstein Sørbøen heldt alt i taumane, medan huldra, felespelarar, lurblåsarar og andre opptredde.

– Ål kommune har vanvitig mykje gull som fortener å skine litt, seier Sørbøen før «Fanitullen« høyrest frå elvekanten.

Ordføraren kom med velvalde ord for kvelden.

– Det er ein fest å sjå dikko. Dette skaper bu- og bli-lyst. Dette er noko ingen klarar å skape aleine - me må gjere det saman. Nyt og kjenn at du lever, uttala ordførar Solveig Vestenfor før ho ønskte alle god sommar.

Stella Solberg Skalle opptredde med song, i lag med fleire andre, og Elvelangsvisa hadde premiere.

Og sjølvsagt var det jonsokbål, på ei flåte ute i vatnet.

– Me vart overraska over kor mange folk det var her, smiler damene Astrid Asgrimsplass, Liv Sorteberg og Ingrid Sørbøen. Dei tykkjer jonsokfeiringa var storvegs.

– Alle tiders arrangement, smiler dei. Damene nyttar Elvelangs-stigen mykje.

– Så de er glade for den nye stigen?

– Ja gjett, strålar dei.

– Dette er kjempebra, seier karane Birger Asgrimsplass og Reidar Toppen. Dei roser arrangementet.

– Og så så fint vêr som me fekk.