– Sjeldan ein klage inneheld så skarpe personlege angrep på ein person i kommunestyret og hennar politiske parti

Statsforvaltaren i Oslo og Viken skal avgjere om Hanne Haatuft (H) var inhabil eller ikkje i ein kommunestyresak i mars i år.

Med eit venta knapt fleirtal, 11-10, vart det etter forslag frå Arbeiderpartiet vedteke å sende saka til avgjerd hjå statsforvaltaren. Forslaget fekk støtte av Høgre.

Senterpartiet slo fast at Haatuft skulle vore kjent inhabil i saka og ville ta klagene til følge og kjenne kommunestyrevedtaket ugyldig.

Klage

Ein klage frå hytteeigar Christian Grahl-Madsen var sakas kjerne då kommunestyret behandla saka torsdag. Han har klaga på kommunestyrevedtaket frå 31. mars i år då detaljreguleringsplanen for Bardøla Høyfjellshotell vart revidert.

Hytteeigaren meiner Hanne Haatuft skulle vore inhabil, og han retta i klagen også skuldingar mot Haatuft for å ha økonomiske grunnar for å seie ja til endringar i detaljreguleringsplanen ved det som no er kalla Bardøla Fjelltun. Årsaka er at ho er gift med eigedomsmeklar Christian Haatuft, som er involvert i sal av leilegheitene.

– Direkte eller indirekte har også Haatuft hatt ein betydeleg økonomisk interesse i at reguleringsplanen vart vedteken, skreiv han i klagen.

«Skarpt angrep»

I ein kort debatt vart det tydeleg at Høgre og Ap såg heilt annleis på saka enn Sp. Jon-Andreas Kolderup (H) meinte det var naturleg at saka blir sendt til statsforvaltaren.

– Me er ikkje tent med ein debatt om habilitet no, sa han, og heldt fram:

– Det er sjeldan ein klage som denne inneheld så skarpe personlege angrep på ein person i kommunestyret og hennar politiske parti. Eg vil også seie det er naturleg at Hallingdølen omtalar dette, men det må vere rett å be avisa tenke gjennom form og oppslag.

Oskar Skulstad (Ap):

– Dette er nok ei kjedeleg sak om habilitet og inhabilitet. Eg beklagar dei kraftige skuldingane mot Haatuft og Høgre. Det er beklageleg. Her let me statsforvaltaren vurdere dette.

– Klar over rolla

Senterpartiets Elin Solveig Bondli Lauvrud og Aslak Geir Skurdal fronta eit heilt anna syn.

– Hadde me i Sp vore klar over omstenda i mars, hadde me stemt for at Haatuft var inhabil. Det gjer me i dag også, sa Lauvrud, og heldt fram:

– Utan å spekulere, er det avgjerande korleis dette blir oppfatta blant innbyggarane. Derfrå får eg eit sterkt inntrykk av at representanten burde teke opp habilitetsspørsmålet i mars, og at forholdet mellom hennar ektemann og planfremmar er av typen forhold som er egna til å svekke tilliten til at kommunestyret treff vedtak på objektivt grunnlag.

Frå Skurdal kom det endå klarare:

– Haatuft må ha vore klar over rolla ho har. No har det vore fleire saker i formannskapet kor det har vorte stilt spørsmål ved hennar habilitet i saker som mannen hennar har hatt med å gjere. Me skal ikkje enkelt feie dette under teppet. Viss statsforvaltaren no seier at ho er habil, ja, då har ho i prinsippet rett til å stemme i alle saker der mannen hennar jobbar.

«Økonomiske forhold»

Senterpartiet fremma forslag om å ta klagen til følge og at behandlinga av saka i mars ikkje var i tråd med forvaltningslova. Då er vedtaket ugyldig, må opphevast og saka må tilbake til administrasjonen for ny behandling.

Sp la i sitt forslag til at det skulle leggast «avgjerande vekt» på at det er økonomiske forhold mellom planfremmar og Haatufts ektemann, som i det offentlege blir oppfatta som særeigne forhold som er egna til å svekke tilliten til Haatufts upartiskheit.

For dette fekk Sp støtte frå Venstre og Lotti Larsgard (Ap), men det var ikkje nok.

Dermed blir det Statsforvaltaren i Oslo og Viken som avgjer saka.