Ny person koronasjuk i Nesbyen

Laurdag fekk Nesbyen eit smittetilfelle dei ikkje visste kjelda til. Den har dei funne no.

– Slik sett var dette bra, seier kommuneoverlege Nils Høva.

Med det positive prøvesvaret onsdag kveld kom også svaret på kor den smitta på laurdag hadde fått viruset frå.

– Personen som no er bekrefta smitta har sete i karantene sidan laurdag, seier Høva.

Det går føre seg ein del testing i Nesbyen om dagen, slik det gjer i alle hallingdalskommunane. Måndag testa dei 23 personar, der alle svara kom att negative. Tysdag var talet omtrent halvert.

– Me har god testkapasitet, seier Høva.

Nesbyen er no oppe i åtte smittetilfelle. Dette er den 64. personen som er bekrefta koronasjuk i Hallingdal. Dei andre fordeler seg slik:

Flå: 3

Nesbyen: 7

Gol: 33

Ål: 12

Hemsedal: 6

Hol: 2