Ny smitte i Nesbyen: – Me er usikre på smittekjelda

– Me vart bitte litt overraska, seier kommuneoverlege Nils Høva om det nye smittetilfellet i Nesbyen laurdag.

Med ein ny positiv koronaprøve er kommunen no oppe i sju smitta. Seks av desse sit i isolat, den siste er ute att.

Smittesporingsgruppa prøver no å kartlegge nærkontaktar til personen som vart bekrefta koronasjuk laurdag. Sju personar er alt sett i karantene.

– Som følgje av dette tilfellet kjem me til å teste ein heil arbeidsplass i Nesbyen måndag, fortel Høva.

Fleire nyheiter om koronaviruset? Sjekk vår samleside

I og med at dei enno ikkje veit smittekjelda til den ferskaste sjuke, tok kommunen laurdag eit nytt grep.

– Me har no stengt sjukeheimen for besøk, seier Høva.

– Me har ein litt uoversiktleg situasjon, og kjenner at dette pustar oss litt i nakken. Me har tilsette på sjukeheimen som er i karantene.

Det foregår ikkje noko testing i Nesbyen i helga. Men aktiviteten blir tatt opp att måndag. Samstundes jobbar smittesporingsgruppa vidare med kartlegging.

Tilfellet i Nesbyen er det 58. i Hallingdal i haust. Slik var status klokka 20 laurdag kveld:

Flå: 3

Nesbyen: 7

Gol: 31

Ål: 12

Hemsedal: 3

Hol: 2

Totalt 58 personar. I Nore og Uvdal er det éin som er bekrefta smitta.