Politiet arbeider med å finne ut kva som var årsaka til bustadbrannen på Torpo.

– Ein faktor som er viktig i dette arbeidet, er å tidfeste så presist som mogleg når brannen starta, seier politibetjent Halvard Haraldseth Jervell.

Han seier politiet rutinemessig etterforskar alle brannar for å finne brannårsaka. Politiet har gjennomført tekniske undersøkingar på brannstaden. I tillegg er dei interessert i vitneobservasjonar. Som eit ledd i dette arbeidet ønskjer politiet kontakt med alle som har ferdast i Torpo-området natt til torsdag mellom midnatt og 02.30.

Haraldseth Jervell seier dei også er interessert i å høyre frå folk som passerte huset utan å leggje merke til noko spesielt.

– Me vil ha kontakt med folk som har gått forbi, anten dei har sett noko eller ikkje. Folk som har passert utan å sjå teikn til brann kan hjelpe oss å fastsetje tidspunktet brannen starta, seier han.

Folk kan kontakte politiet på telefonnummer 02800.